Psa 28 | NdeIBE | STEP | Ihubo likaDavida Ngikhala kuwe, O Jehova, Dwala lami; ungangivaleli indlebe yakho. Phela uma ulokhu uthule ngizakuba njengalabo asebengene egodini.

Psalms 28

1 Ngikhala kuwe, O Jehova, Dwala lami; ungangivaleli indlebe yakho. Phela uma ulokhu uthule ngizakuba njengalabo asebengene egodini.

2 Zwana ukukhala kwami ngicela umusa, nxa ngikhala kuwe ngicela usizo, nxa ngiphakamisela izandla zami eNdaweni yakho eNgcwelengcwele.

3 Ungangihuduleli khatshana ndawonye lababi, lalabo abenza ububi, abakhuluma kamnandi labomakhelwane kodwa begaya izibozi ezinhliziyweni zabo.

4 Bajezisele lezozenzo zabo kanye lemisebenzi yabo emibi; bajezisele imisebenzi yezandla zabo, ubaphindisele ngokubafaneleyo.

5 Njengoba bengananzi imisebenzi kaJehova lalokho okwenziwe yizandla zakhe, uzababhidliza angaphindi ababumbe futhi.

6 Udumo kalube kuye uJehova, ngoba ukuzwile ukukhala kwami ngicela umusa.

7 UJehova ungamandla ami lesihlangu sami; inhliziyo yami yethemba kuye, ngiyancedwa. Inhliziyo yami iyaqolotsha ngentokozo njalo ngizambonga ngehubo.

8 UJehova ungamandla abantu bakhe, inqaba yensindiso yogcotshiweyo wakhe;

9 Sindisa abantu bakho ubusise ilifa lakho; woba ngumalusi wabo ubathwale lanininini.